世界第二蜜瓜包由日本進駐香港喇！

千呼萬喚的日本蜜瓜包終於係香港開店喇！

而大鄉里的小編去左兩次日本，係一次都無食過！

對佢有期望，係最近睇"多啦A夢"，蜜瓜包係多啦美的最愛！

多啦A夢仲為左排蜜瓜包，排左成半日~~

所以我就已經好想試。

點解又會話係世界第二呢?咁第一係邊?

原來呢間店的老闆係一個好飲水思源的人，

佢始終認為教授佢手藝的師傳先係世界第一；

同時佢對自己好有信心，所以佢就命名為世界第二。

但佢都無愧世界第二的名氣，

因為佢只係賣蜜瓜包就賣到日本各地都有分店。

台灣亦有分店。

好啦！我地開始試下香港的世界第二蜜瓜店的味道！

雪糕蜜瓜包有三種味 ____

朱古力味，雲尼拿味，綠茶味

$38一個(日本都賣450円)

你睇下個朱古力幾醜，唔係我地遲拍，

係佢比我個陣就咁薄，唔似報導咁多雪糕，

我之前睇佢有兩層雪糕架！>..<

用飲管飲的蜜瓜包，小編命為三管齊下

(我三隻味有試齊架嘛！)

未買已經好香牛油味飄入，好肚餓！

晚上約六點四十五分排，排左十五-二十分鐘。

佢每一輪約二十個，每一輪排10分鐘左右。

係新鮮出爐，個包包係辣手架！so hot~~

咁當冰遇到熱會點?係融！

所以唔好等，即刻咬！

唔係你食唔到一半雪糕一半麵包架！會"咇"雪糕汁！

綠茶味好香濃，唔會有苦澀味，奶味又唔太重，

係我鐘意的綠茶雪糕味道！

雲尼拿的味道都係好香，好滑，不錯的選擇！

朱古力濃係濃，但就唔算好特別。

蜜瓜包個面脆而酥，有啲似菠蘿包的，但就無咁酥，亦無抹蛋水，所以仲有同包色一樣；

包底就淨脆(有啲似餅)

雪好快融，融左入中，係另一個感覺，

冰火兩重天，又酥又濕，好得意！

小編覺得可以試下放凍牛油！菠蘿油變蜜瓜油，嘻嘻…

By the way,食得幾論盡下！好彩佢店面有紙巾拎，

大家食個陣小心啲喇！唔好整污糟件衫！

但小編覺得望住一出爐脹卜卜的包包，

加雪糕食落肚，好有滿足感！

可能日本會更好食，始終雪糕佢都唔係用日本雪糕，

份量都差少少！$38，當食個甜品啦！

地址：

地址：香港銅鑼灣景隆街15-27號地下1A舖 (地圖)

營業時間：星期一至日 11am-10pm

麥提莎沖劑

冬天，小編就最鐘意沖野飲既！

返工，凍到手腳冰冷，一返到公司，就沖杯熱野飲暖暖身先！

朱古力相信都係大家的選擇之一，而麥提莎更係大家從小到大的零食！

而竟然比我發現左佢出左沖粉。

哇！正啊！嗱嗱淋買黎試啦！

包裝教沖法時4茶匙麥提莎朱古力粉, 加水或牛奶沖成。 

一打開包裝，好大陣麥提莎味啊！

大佬，想引死人咩！

而小編就用一半熱水,一半牛奶沖, 沖出來的顏色很深色, 味道是有少少麥提莎味,但並非想像中的香, 未去到想番飲的程度。

建議用全牛奶沖泡，應該會更香，或者溝啲忌廉。

但沖泡方法因人而異，真係要試過至知！

應該唔會再買，咁既價，都係買麥提莎好過！😩

(5☆為最高份)
味道 ☆☆

香味 ☆☆☆☆
價錢 ☆☆☆

CITYSUPER

$50/175g

紫薯芋圓紅豆沙、紫薯蓉芋圓豆腐花

又有新出的芋圓店喇！

VRM當然會去一試啦！

係太子落地鐵，又行錯左隔離街！終於搵到佢----

海記合桃坊甜品　

紫薯芋圓紅豆沙

哈！唔好以為我地搞亂左先影啊！係佢一拎上黎就係咁架！

同張相係差好遠既！

相係無咁多水架！係啲餡料係面！紅豆沙係底！

呢個就岩岩相反，紅豆沙蓋過晒啲餡料！　



舀起比大家睇下啦！

有芋圓、紫薯圓、番薯圓，蓮子幾大粒！

好香陳皮味！紅豆煲到爛晒，有起沙。

味道唔太甜！加埋芋圓一齊食，煙煙韌韌、軟軟綿綿咁！

　

 紫薯蓉芋圓豆腐花

睇到中間係一大球紫薯蓉，而芋圓數目亦唔算少，足料的！

紫薯圓我個人就真係第一次食！

平時都係得芋圓同蕃薯圓。 

 豆腐花算得上係滑，無咩鞋口的感覺。

我無落黃糖，就係啲糖漿架姐！

就咁食會覺得淡，但加埋紫薯蓉食就岩岩好。

其實本身紫薯有甜既，佢個紫薯好綿，好黏，勺起會有時成球都勺起 ^^好香，好滑的紫薯，正！






我文中無特別講芋圓，係度一次過講啦！

香港我第一間食的芋圓係有返各自的味道。

芋圓食到有芋頭香；
紫薯圓亦同樣食到屬於紫薯個種淡淡的香味：
番薯圓亦有番薯的味，但就淡啲。

而且唔會上枱之後，都仲食到有成口粉的感覺，
好怕入口咬開，有粉(好似未煮熟咁) 　咦…(打冷顫)

口感又煙韌有咬口，但又唔會要嚼好耐喎！

推薦大家可以一試，覺得唔錯！


海記合桃坊甜品　
太子西洋菜南街232號

又有新野~紫薯迷出動喇！今次係紫薯牛奶啊!

準備去新加坡的朋友仔要留意BengawanSolo!!

今日飲食偵探為大家介紹下仲未引入香港的蛋卷, 就是來自新加坡的 BengawanSolo。

飲食偵探有機會食到是因為有朋友去完新加坡買的! (所以去新加坡的朋友不妨買呢款蛋糕做手信都不錯💝!!)

外表沒有什麼特別, 食落口時亦不為意有什麼特別,直至食到中心位(亦即是最多忌廉的位置),感覺著忌廉厚厚的口感才細心一看,發現不衹是忌廉,還有芝士... 若你細心一看,是還可以看到一絲絲的芝士碎和忌廉一起被蛋卷包著。

蛋卷是斑蘭味,蛋卷食落比香港連鎖店的蛋卷較實 (唔係食兩三啖就冇左個啲) 。但較為可惜的是斑蘭味道不太突出,反而特出了薄薄忌廉配上厚厚的一層芝士碎,帶出微微的芝士香和口感厚實,更有嚼口。

評分:  (5☆為最高)

外觀方面: ☆☆☆

味道方面: ☆☆☆

價錢方面: N/A (都話明係手信,點會問人價錢?!😅😅)

Post by: 飲食偵探

Photo shoot by: 飲食偵探

「雲」一般的五層芝士流心包@麥上日光

飲食偵探去了一間充滿歐美風格的Guschlbauer(麥上日光)，當然去試高人氣的奧地利5層流心芝士包、5層抺茶流心芝士包和5層流心柚子蜜芝士包。

要購買的時候，先到收銀台付款，然後領牌到店內領取，相信是以確保食品的新鮮度和提高優質的服務，有別於其他麵包連鎖店。它們是用紙袋形式去裝住芝士包，感覺上較為高尚。 雖然它是芝士包，但是它好似甜品和蛋糕一樣需放於雪櫃裡。所以袋裡附上一張卡，是介紹芝士包的進食事宜。(非常貼心!)

每一個包都是一個個袋好的，有紙墊托住個包和透明膠袋用貼紙包好，防止包包移來移去，個設計都幾貼心架。

外表看在麵包面上灑上糖粉， 中間夾住多層的忌廉，有點像忌廉蛋糕。中間夾住幾層的忌廉芝士散發出濃郁的芝士味，一層麵包一層忌廉芝士，一層麵包一層忌廉芝士咁既層次可以中和忌廉芝士的濃厚味道, 減低膩的感覺。

而抹茶芝士味，芝士味道較搶，芝士與抹茶有點不搭配；失去層次口感。另外，柚子蜜芝士味，柚子蜜味道清香，如果不太喜歡太濃味道的朋友仔，可以選擇柚子蜜芝士味，但就感覺甜左啲。

柚子蜜同抹茶味都係新口味，但個人覺得唔太夾。既然係五層芝士蛋糕，必須食到層次感，而呢兩種味道就似係抹茶忌廉芝士或柚子蜜芝士，而無左食落的層次感，重要係味道不太夾，所以應該不回購。

反而ORIGINAL個隻麵包，就買左好多次，麵包軟，芝士綿滑，果然不愧有「雲」一般的麵包之稱！值得回購！

講流心，佢切得開四塊賣比你，你都唔好期望係好似酒樓個啲奶黃流沙咁水。佢係偏濕潤個種，但柚子蜜同抹茶個兩種就真係濕啲！所以唔好係街食，成手都係啊！oh my god！

芝士包軟熟，芝士忌廉濃郁，但是吃的時候有啲論盡，因為包上的糖粉會很容易跌到周圍到係，所以建議大家用叉進食會比較好。

評分: (最高分為☆☆☆☆☆)

外觀方面 ☆☆☆☆

價錢方面 ☆☆☆☆

奧地利5層流心芝士包

味道方面 ☆☆☆☆☆

奧地利5層抺茶流心芝士包

味道方面 ☆☆☆

奧地利5層流心柚子蜜芝士包

味道方面 ☆☆☆

  

而麥上日光又有新搞作喇！呢次有四款比你揀，唔知係咪四款出晒呢！?

你地又鐘意食邊款啊?我隻隻都有興趣啊！(果然係為食架！)

等佢出左之後，飲食偵探再為你地寫食評！

Post by 飲食偵探

Photo Shoot by 飲食偵探 & 互聯網

Uncle Tetsu’s Chessecake

UncleTetsu’s Chessecake 當然就係賣Chessecake啦！一踏入店舖裡就見到一個個圓碌碌的芝士蛋糕排得整整齊齊, 起初以為有得揀，但一下單,店員已將包裝好的蛋糕拿給我。 (😅真係好有效率!)

之前買過一次，佢每次出30個左右，每人只限買一個，真係手快有手慢就等啦！下一輪等15-20分鐘啦！話耐唔耐，話快唔快！

但係店入面等其間你會異常餓，因為滿滿係芝士的蛋白質同澱粉質結合的香味！

*佢係開放式，可以見晒佢攪拌，入焗爐，包裝的過程！

一個蛋糕望上去平平無奇,要就外表來看, 特別之處就再於品牌的壓印,因為每當蛋糕出爐之後,最重要的步驟就是幫蛋糕蓋印仔，亦都係入盒前的步驟。🐽🐽

UNCLE個樣幾可愛架！

食第一口的時候, 芝士的味道在口中徘徊,口感超級柔軟濕潤, 想起以前都曾經食過這種味道。(以前係以前係OK店有得賣,細細個既芝士蛋糕賣20蚊左右, 味道一流! 可惜已不再~)

評分:

外觀方面 ☆☆☆

味道方面 ☆☆☆☆☆

價錢方面 ☆☆☆☆

地址：銅鑼灣景隆街3號地下(SOGO後面駱克道附近)

順帶一提，佢9月初新出左Penna Cotta，我地都未去試啊！

試左再寫評語話你地知^0^

韓國大熱 乳酪唧唧冰

新產品: Lotte Ice Yogurt

            아이스 요구르트

 (譯音: a i si yo ku reu theu)

售價:$19.9 /170ml

韓國樂天出名到爆的益力多沙冰已經在打入香港市場, 飲食偵探一於去左係7-11買到黎試下。

首先講下外觀, 形狀是比iphone6 還要大的益力多(簡單黎講就係放大版的益力多),包裝比人感覺得意和有親切感, 益力多相信曾經係好多人兒時的飲品。

有一個疑點就是廣告上的包裝與實品有差異, 廣告上的益力多沙冰如下:

唔通呢個先至係真正韓版?! 味道又會唔會有不同呢？！

呢個對飲食偵探係一個謎... 唔知有無朋友仔知道呢?

因為是沙冰而不是冰條, 所以有個嘴形位好似細個飲個的啜啜爽咁... (好似暴露左我但係還是沙冰的情況下就要擠出來食,好似擠牙膏咁。

廣告要改喇！你今日飲左未要改成你今日啜左未?^^

夏天時係街度擠出來飲飲又真係方便又消暑！

方便的話，可以剪開包裝袋！用匙勺黎食，一大啖放入口，冰涼酸甜的感覺令人為之一震！

平時飲益力多是偏酸的 (咁是酸性乳酪呀嗎～) 但飲這個沙冰又不太酸,亦無咁甜，覺得可能因為是雪過的關係。味道又真係益力多的味道！

其實再簡單黎講，都係一支無咁酸的益力多雪到變冰！哈哈…換個包裝，飲得方便啲又拎出黎賣！

價錢可圈可點啦！話佢貴又唔係，話佢平又實係捂住良心啦！佢入面的份量最多都係兩枝益力多左右！(可能多少少既)，最貴係個包裝掛！

味道方便，我覺得鐘意飲益力多既人不妨買黎一試，幾新鮮的，啲冰都打得幾碎同平均！當你唔想拎住枝雪條或雪糕周圍行，怕整污糟衫同隻手，呢益力多冰沙無疑係一個好好的選擇。

飲食偵探做左個小測試, 足足測驗左45分鐘, 睇下沙冰的變化同味道。

45分鐘之後, 打開後當然變晒水狀,仲要係充滿泡沫的益力多,味道差不多。

你地今日，啜左未?

評分:

價錢方面 ☆☆☆

外觀方面 ☆☆☆☆☆

味道方面 ☆☆☆☆

星巴克 夏日新星冰樂,你點睇?!

正值夏天，Starbucks當然不會忘記星冰樂啦，近期又有新口味啦!!

今次是朱古力紅茶伯爵啫喱星冰樂同雙重朱古力抹茶星冰樂，為炎炎的夏日消下暑。

因為VRM有Starbucks會員是綠星以上，所以買新口味星冰樂的推廣期內可以擁有免費升級優惠，相信喜歡Starbucks的你都應該擁有這個優惠吧!

首先，講講朱古力紅茶伯爵啫喱星冰樂，同推廣的相片中都有8成相似。

這杯星冰樂主打是用了肯亞紅茶沖成的，所以茶味很濃，搶左朱古力的味道，而伯爵茶啫喱不是爽口，似布甸口感，方便客人吸吮。伯爵茶的味道好香，吸上來中和左飲品的甜味！(隻伯爵茶有啲似TWINGS個隻黃色包裝)。而且食唔到有碎朱古力粒，可能只是個別店舖問題，仲有忌廉比較少和朱古力紅茶粉同朱古力粉分別不大，就飲唔出有咩分別，我諗純粹裝飾同gimmick。

另外，就是雙重朱古力抹茶星冰樂，同推廣的相片中都有7成相似。

這杯星冰樂主打是用了日本綠茶沖成的，杯底同杯面都加左朱古力醬，不過VRM建議先搞搞個杯底先好再飲或者直接叫佢少朱古力醬，否則一飲就會成口都係朱古力醬，超甜同埋口感怪怪的，因為佢隻朱古力醬似糖漿的感覺。另外我買的這杯同推廣的相片中的分別，大家有沒有留意到?  

………………找不同……….....…

就是鮮忌廉上面的粉並非抹茶粉，而是朱古力粉，有點失望，而且粉的數目極少。

VRM 因為各有自己鍾意的星冰樂，所以以下意見純粹個人喜好，因為我地各有唔同鐘意的口味嘛！

M：雖然兩款星冰樂係新款的，但係個人會比軟喜歡碎朱古力星冰樂。但若要兩個揀一款就會建議飲雙重朱古力抹茶星冰樂，雖然雙重朱古力醬會有點過甜同難攪散，但是只要將飲管拉高少少黎飲就能享受到綠荼混上朱古力的適中的甜道。

R：雙層朱古力抹茶星冰樂個人認為幾種野是分開的，無融合感的味道，同埋朱古力實在係連攪都攪唔郁咁制；反而鐘意朱古力紅茶伯爵啫喱星冰樂，朱古力同紅茶係濃郁的，成杯都好清香，可能我個人鐘意飲茶的關係，兩杯就比較鐘意紅茶呢杯。但其實我個人黎講，就係唔試好過試，我地連Grande都飲唔到一半。

V： 一向都飲開抺茶星冰樂，今次推出的新產品突然加上雙重朱古力，感覺上沒有新意及有點畫蛇添足，朱古力份量太多，搶去抺茶味道，口感也變得奇怪，還是原來的抺茶星冰樂最好飲；朱古力紅茶伯爵啫喱星冰樂，茶味突出，幾特別的口味，可惜本人不太好啫喱，如果轉為台式珍珠應該會不錯！